Qytetarët e Kosovës që jetojnë jashtë vendit, gjatë muajve të verës kur vinë për pushime kanë mundësinë që të marrin pjesë në procesin e regjistrimit, proces ky i cili ka filluar kohë më parë.
Ministria e Diasporës në Qeverinë e Kosovës, gjatë kësaj kohe ka filluar një fushatë me anë të së cilës po informon këta të fundit për rëndësinë e regjistrimit të tyre.
Zëdhënësi i Ministrisë së Diasporës, Lorik Pustina në një prononcim për Radion Evropa e Lirë ka treguar për rrjedhën e kësaj fushate.
“E kemi parë të nevojshme që të zbatojmë një fushatë agresive në kohën kur bashkatdhetarët tanë janë në Kosovë, ashtu që t’ua shpjegojmë atyre rëndësinë e regjistrimit, benefitet që mund t’i kenë”.
“Mund të shihen në qytetet e Kosovës regjistrues të ndryshëm të identifikueshëm me logon e re me sloganin ‚Ti je pjesë e atdheut‘ që komunikojnë më bashkatdhetarët, i japin flet regjistrimet, i mbushin ato dhe pastaj i kthejnë në Ministri të Diasporës pastaj ato futen në databazë”, sqaron Pustina.
Qëllimi i regjistrimit është evidencimi i numrit të saktë të pjesëtarëve të diasporës dhe mërgatës, shtrirja e tyre gjeografike, struktura demografike, shtetet ku jeton dhe vepron diaspora e mërgata, si dhe regjistrimi i shoqatave dhe formave të tjera të organizimit të tyre.
Pjesë e këtij regjistrimi është çdo person që ka vendbanim apo vendqëndrim jashtë Republikës së Kosovës, që ka lindur ose ka prejardhje nga Kosova.
Regjistrimi i qytetarëve të Kosovës që jetojnë jashtë vendit, thotë Pustina, është një proces që po shkon mirë edhe përkundër një ngecje gjashtë mujore që ka qenë vitin e kaluar.
“Tani për tani ky proces është duke ecur shumë mirë, dhe ne jemi të befasuar me shifrat që po na vijë dhe shpresojmë se do të vazhdojë deri në vitin 2016, kur pritet edhe të përfundojë regjistrimi aktiv i mërgimtarëve tanë”, ka vlerësuar Pustina.
Regjistrimi i diasporës ishte konsideruar si një proces mjaft i rëndësishëm për vendin nga autoritetet në Kosovë dhe shoqëria civile në përgjithësi.
Elbasan Morina nga shoqëria civile, në një prononcim dhënë më herët për Radion Evropa e Lirë e kishte vlerësuar si mjaft të rëndësishëm regjistrimin e diasporës.
“Kosova ka interes të madh që të kuptojë saktë numrin e popullsisë që jetojnë jashtë shtetit edhe pse është e pamundur të dihet 100 për qind saktë, pasi që ky është një proces që vazhdon. Ne jemi dëshmitarë të trendëve të reja të migrimit që kanë ndodhur në dy vitet e fundit. Pra është e pamundur të përcillet vazhdimisht ky proces,por se gjithsesi i ndihmonshtetit në formulimin e politikave të ndryshme”, ka thënë Morina.
Ndryshe, nëpër strategji e dokumente të ndryshme të autoriteteve të Kosovës, vlerësohet se një e treta e qytetarëve të Kosovës jetojnë jashtë territorit të saj.
Derisa,sipas disa të dhënave të Agjencisë së Statistikave të Kosovës, thuhet se janë rreth 700 mijë kosovarë që jetojnë në vende të ndryshme të botës, shumica prej tyre në Evropën Perëndimore dhe në Shtetet e Bashkuara të Amerikës.
Qytetarët e Kosovës të cilët kanë emigruar në vende të ndryshme të botës, kanë ndihmuar vendin e tyre për vite me radhë.
Dërgesat e emigrantëve kosovarë që në vit arrijnë shifrën e gjysmë miliardë euro, vazhdojnë të luajnë një rol të rëndësishëm në ekonominë e vendit, duke nxitur rritjen ekonomike dhe duke siguruar të ardhura shtesë për familjet me të ardhura më të vogla. / RTKLive.com
Lëreni tentativat dhe shtyrjet e bërrylave për dominimin mbi fenë shkruanProf.Dr. Xhabir Hamiti në Facebook, sepse atë askush deri më sot nuk ka arritur të fusë në grusht dhe as që të ketë monopol mbi të. Lëreni dhe mos e instrumentalizoni fenë për interesa të ngushta ditore në dëm të interesit të përgjithshëm të bijave dhe bijve tonë. Mos bëni tregti dhe politikë me fenë duke dëmtuar e nënçmuar tjetrin. Mos u bëni argat të agjendave të jashtme të cilat përmes fesë po mundohen që të brejnë dhe të luhatin bashkëjetesën dhe të ardhmen tonë të përbashkët. Thoni po respektit dhe përkatësisë së çdonjërit për bindjen e vet të zgjedhur fetare dhe thoni stop provokimeve dhe urrejtjes në emër të saj. Zoti është mbi fenë që ne e predikojmë, por njëkohësisht është edhe Krijues i të gjithë neve pa dallim. Të kaluarën lërjani historisë, sepse ajo më nuk kthehet. Shikoni të tashmen dhe punoni drejt të së ardhmes. Shqiptarët më së paku kanë nevojë sot që fenë t`a bëjnë lajm ditor, kur dihet se para veti presin shumë punë për të bërë drejt rregullimit dhe funksionalizimit të mbarë e prosperues të shtetit tonë. E drejta e besimit dhe praktikimit të fesë duhet të institucionalizohet barazisht dhe për të gjithë pa dallim, por njëkohësisht edhe të sanksionohet abuzimi me të në dëm të tjetrit dhe në dëm të interesit të përbashkët shoqëror dhe kombëtar. Të gjithë ata popuj që e kanë përdor emrin e Zotit për t`i dëmtuar të tjerët padrejtësisht, asnjëherë nuk kanë shpëtuar nga dënimi i Tij. Shembuj të tillë kemi edhe sot, përplot. Lëni njerëzit të lirë në besimin e vet dhe mos bëni orvatje për supermaci fetare. Shoqëria e jonë, përveç besimit në Zot ka nevojë si kurrë më parë për respektim të ligjit dhe drejtësisë, zhvillimit ekonomik dhe mirëqenies sociale si dhe luftimin e monopolit dhe korrupsionit të cilat i kanë fut thellë rrënjët në mesin tonë. Këto të këqija po e zbehin ndjeshëm shpresën e të rinjve tanë për një të ardhmen më të mirë të tyre. Zoti nuk është problem i shqiptarëve sot e as që kanë qenë ndonjëherë, por jemi vet ne që ende nuk jemi këndellur e zgjuar si duhet; për të punuar drejtë, për të dashur njëri tjetrin pa hile, për t`i luftuar të ligat dhe keqen tonë bashkërisht.
Deputeti Ilir Deda, i bërë pjesë e Lëvizjes Vetëvendosje para zgjedhjeve të fundit parlamentare po sfidon konceptin e subjektit politik të ndërtuar nga Albin Kurti.
Deda i ftuar në një emision argëtues në Klan Kosova përmes një veprimi të vogël ka dërguar një mesazh të madh.
Në emisionin ku mysafirët shtyhen të tregojnë talentin e tyre në pikturë, Deda ka zgjedhur të bëjë hartën e botës, duke e theksuar flamurin e Kosovës, simbol i cili nuk është pranuar asnjëherë nga subjekti politik i ndërtuar nga Albin Kurti.
Ai për këtë edhe ka marrë vërejtje të shumta pas postimit të fotografisë në Facebook. Shumë aktivistë të Lëvizjes Vetëvendosje e kanë parë këtë si fyerje dhe kanë kërkuar nga ai që të kërkojë falje.
“Lëvizja VETVENDOSJE! është kundër një flamuri artificial i cili iu është imponuar popullit shqiptar pa e pyetur atë! Pranimi i këtij flamuri nga një anëtar i kësaj lëvizje e dëmton rëndë VV-n!”, ka shkruar një komentues në fotografinë e postuar nga Deda.
“Ilir Deda ju duhet të kërkoni falje që keni bër foto afër një simboli i cili përqan kombin shqiptar”, ka shkruar një komentues tjetër. Deputeti Deda në Vetëvendosje kaloi nga shoqëria civile, ndërsa më parë bashkë me kryetarin aktual të Prishtinës, Shpend Ahmeti, ishte edhe themelues i partisë Fryma e Re, e cila u shua pasi nuk mundi të marrë votat e mjaftueshme sa për t’u bërë pjesë e Kuvendit të Kosovës.
Koncepti politik i Dedës i treguar gjatë aktivitetit të tij gjatë kohës sa ishte pjesë e shoqërisë civile, por edhe i politikës ka qenë diametralisht i kundërt me atë të Lëvizjes Vetëvendosje.
Deda vazhdimisht kishte proklamuar një frymë liberale, për dallim nga nacionalizmi ekstrem që karakterizon Vetëvendosjen.
Këto veprime edhe mund të mos kalojnë pa u vërejtur në partinë të cilën tani e drejton Visar Ymeri, pasi në të kaluarën anëtarë të cilët kanë devijuar nga parimet e vëna nga Albin Kurti, janë përjashtuar nga ky subjekt politik. /lajmi.net
Në kryeqytet çështja e furnizimit me ujë vazhdon të jetë problematike. Ndërtimi i fabrikës së ujit në Shkabaj, shihet si zgjidhje që i tejkalon telashet.
Në kryeqytet çështja e furnizimit me ujë vazhdon të jetë problematike. Ndërtimi i fabrikës së ujit në Shkabaj, shihet si zgjidhje që i tejkalon telashet.
Në rrugën Milloshevë – Obiliq po vazhdojnë punimet për projektin e Fabrikës së Ujit, aty ku është vënë gurthemeli nga Ujësjellësi Rajonal Prishtina në nëntor të vitit 2014. Në këtë lokacion ndodhet stacioni i pompave, por fabrika e ujit do të ndërtohet në Shkabaj.
„Ne veç jemi në përfundim të hapjes së trasesë për vendosjen e gypave transportues, gjithçka po shkon sipas planit dinamik, ndërkaq brenda 1 muaji do të fillojë ndërtimi i fabrikës në Shkabaj, sepse para se të fillojë ndërtimi i mureve të fabrikës duhet të përfundojnë disa punë nëntokësore siç janë vendosja e gypave transportues e mandej të vazhdohet me ndërtimin e fabrikës“, tha zëdhënësja e Ujësjellësit Rajonal Prishtina, Arjeta Mjeku.
Nga ndërtimi i fabrikës së ujit në Shkabaj do të përfitojë direkt Komuna e Prishtinës, Graçanicës, Fushë Kosovës dhe Obiliqit.
Nga ky projekt në mënyrë direkte do të përfitojnë rreth 350 mijë konsumatorë, ndërsa indirekte rreth 600 mijë të tjerë. Arjeta Mjeku, zëdhënëse e Ujësjellësit Rajonal ‘Prishtina’ thotë se funksionalizimi i kësaj fabrike kërkon shumë para për përpunimin e ujit, sepse do të ketë shpenzim shumë të lartë të energjisë elektrike. Ajo thotë se qytetarët do të duhet të paguajnë për shpenzimet e ujësjellësit dhe kanalizimit, përndryshe edhe atëherë do të mbesin pa ujë.
Nga ana tjetër, qytetarët po e presin realizimin e këtij projekti, për shkak të rëndësisë jetike që ka uji.
„Po uji nevojitet për çdo rast, ujë duhet me pasur gjithë, pa ndërprerje“.
„Dhashtë Zoti të gjitha ato premtime të realizohen dhe janë në interes të çdo qytetari. Tash në çfarë kohe jemi, në çfarë shekulli jemi një herë e përgjithmonë duhet të kryhet kjo çështje“.
Për këtë projekt, Ujësjellësi Rajonal Prishtina ka marrë kredi 20 milionë euro nga Banka Gjermane, ndërsa Komuna e Prishtinës, Qeveria e Kosovës dhe Komisioni Evropian kanë dhënë donacion nga 5 milionë euro, secili prej tyre.
Më 19 korrik të vitit 1998, si pasojë e një sulmi të forcave serbe, në Rahovec pati shumë të vrarë e të plagosur
Në Tehqen e Sheh Myhedinit në Rahovec janë masakruar shumë gra, fëmijë dhe pleq që kishin kërkuar strehim në këtë institucion fetar.
Te vendi i quajtur “Tuba” u gjetën të masakruar dy profesorë si dhe gjashtë trupa të karbonizuar, identiteti i të cilëve nuk u mësua, ndërsa gjithsej u regjistruan 150 persona të vrarë. Dëshmitarët që kishin arritur t’i shpëtojnë këtij krimi tregojnë se ushtria, policia dhe paramilitarët serb kanë ekzekutuar civilë shqiptarë arbitrarisht.
Gjatë kësaj ofensive u morën peng u zhdukën e u kidnapuan shumë shqiptarë, për fatin e të cilëve nuk dihet asgjë. Organet e pushtetit serb në Prizren, më 22 korrik, në varrezat e këtij qyteti hapën dy gropa të mëdha dhe varrosën shumë shqiptarë të vrarë gjatë ofensivës në Rahovec / RTKLive.com
Mit dem Laden des Videos akzeptieren Sie die Datenschutzerklärung von YouTube. Mehr erfahren
Qindra besimtarë myslimanë në gjithë Kosovën falën sot në mëngjes namazin e Fitër – Bajramit.
Në manfiestimin qendror në Xhaminë e Madhe në Prishtinë, myftiu i Kosovës Naim Tërnava iu drejtua xhematit, duke u lutur për paqe, begati, tolerancë dhe solidaritet.
Gjatë fjalimit të tij, Tërnava porositi se Bashkësia Islame e Kosovës është kundër çdo ekstremizmi dhe kundër çdo terrori që po bëhet nëpër vende të ndryshme të botës.
Lutjes për mirëqenie dhe tolerancë iu bashkua edhe xhemati i pranishëm.
Pas 30 ditëve të Muajit të Ramazanit, me agjërim, lutje dhe adhurime, besimtarët myslimanë shqiptarë dhe ata të mbarë botës, prej sot, në tri ditët e ardhshme, festojnë festën më të madhe islame, atë të Fitër – Bajramit.
