von Zemraadmin | Juni 28, 2015 | Kosova
Terrorizmi ndërkombëtar është një nga problemet shqetësuese të shoqërisë bashkëkohore dhe kjo epokë jo rastësisht njihet si epoka e terrorizmit ndërkombëtar.
E, nga terrorizmi është e prekur edhe Kosova, në një formë apo në një tjetër, thotë profesori i terrorizmit ndërkombëtar në Universitetin e Tetovës, Bashkim Selmani.
Sipas Selmanit, Kosova gjendet në fazën e parë të kërcënimeve. Organizatat e ndryshme të ardhura në Kosovë pas luftës, thotë ai, shfrytëzuan vakuumin ligjor për të përgatitur në prapaskenë veprime terroriste, derisa vinin si organizata humanitare.
Sipas tij, roli dhe funksioni i institucioneve fetare në Kosovë duhet të jetë më i shtuar, me aktivitete, në përzgjedhjen e predikuesve dhe elementeve të ndryshme.
Për të përgatitur dhe për t’u involvuar në organizata terroriste, sipas Selmanit duhen plotë tri dekada.
“Decenia e parë është përzgjedhja e këtyre individëve ose këtyre kategorive; decenia e dytë është trajnimi i tyre në një apo në formë tjetër; dhe, faza e fundit është deri tek vetë viktimizimi ose flijimi”, ka thënë ai për Kosovapress.
Videoja e publikuar javë më parë në internet ku një shtetas i Kosovës kërcënon se do të ndodhin akte terroriste në Kosovë, janë veprime dhe deklarata individuale, por që janë një paralajmërim për institucionet e Kosovës. Ndaj, Selmani thotë se Kosova duhet të jetë më tepër e fokusuar në aspektin ekonomik, që t’i trajtojë ata njerëz dhe këto kategori, sepse ka individë që për shkaqe ekonomike vetëflijohen. Madje, ai thekson se nuk është vonë që institucionet të përgatisin një trup institucional të veçantë që do të merrej drejtpërdrejt me hulumtimin e këtyre rasteve. / RTKLive.com
von Zemraadmin | Juni 28, 2015 | Kosova
Deputeti i Vetëvendosjes, Ilir Deda, ka propozuar themelimin e një Gjykate për Krime Lufte me Seli në Prishtinë si kundërpërgjigje ndaj refuzimit të Gjykatës Speciale që i ka bërë dje Kuvendi i Kosovës.
Deda ka thënë se tash pas dështimit të Gjykatës në Parlament duhet të ulen pozita e opozita për të gjetur zgjidhje pa inate e barrikadime.
Ai ka thënë se Kosova duhet të pajtohet për dëshmi dhe mbrojtje të dëshmitarëve jashtë vendit e që janë të rrezikuar në Kosovë.
Lexojeni të plotë propozimin e Ilir Dedës:
Tash, pa inate, të gjitha partitë politike në Kuvend duhet të ulen dhe ta propozojnë alternativën e Kosovës ndaj Gjykatës Speciale që nuk kaloi dje. As nuk duhet Qeveria të inatoset dhe për inat ta procedojë amandamentin e dështuar kushtetues, dhe as nuk duhet të barrikadohet opozita.
Tash duhet të mirremi vesh për Gjykatën e Kosovës për Krime Lufte. Gjykatë të njëjtë çfarë kanë Kroacia, Bosnja e Serbia. Mund ta bëjmë këtë Gjykatë të Kosovës për Krime Lufte, me seli në Prishtinë; edhe nëse është me gjykatës e prokurorë ndërkombëtarë; të bëhen gjykimet në Kosovë për çfarëdo pretendimi; dhe të pajtohemi për dëshmi dhe mbrojtje të dëshmitarëve jashtë Kosovës që janë të rrezikuar këtu.
Ekziston edhe rruga e cila e sforcon shtetin tonë dhe pjekurinë politike dhe shoqërore për ballafaqim me të gjitha krimet e kryera në Kosovë, dhe jo vetëm sipas pretendimeve të Martyt. Pa inate, pa barrikadim. / Reporteri
von Zemraadmin | Juni 28, 2015 | Kosova
POROSI PER KOMUNITETET FETARE SHQIPTARE
Nëse të gjitha komunitete fetare shqiptare jetojnë nën një territor të caktuar hapësinor siç janë sot , që do të thotë; kanë një gjuhë, një gjak, kanë një dhe si dhe një traditë, para së gjithash dhe në rend të parë për ta duhet të jetë “ E mira e përbashkët e tyre”.
“ E mira e përbashkët” është siguria, stabiliteti, mirëqenia ekonomike dhe politike si dhe liria e besimit dhe shprehjes për të gjithë dhe pa dallim. Ndryshe , “ E mira e përbashkët “, është shteti dhe qeverisja e jonë, të cilin duhet t`a zhvillojmë dhe forcojmë mbi këto parime. Besimin në Zot nuk mund t`a gëzoj dhe përjetoj askush në nivelin e duhur dhe të kënaqshëm , nëse vendi ku ti jeton nuk ka stabiliteti politik dhe nuk ka mirëqenie të duhur ekonomike.
Prandaj, vetëm përmes realizimit “ të së mirës tonë të përbashkët” ne do të hapim mundësinë edhe të zhvillimit të të gjitha komuniteteve tona fetare në mesin tonë si dhe njëkohësisht do të rrisim respektimin e ndërsjellë të tyre. / Shkruen Xhabir Hamiti në profilin e tij ne Facebook
von Zemraadmin | Juni 28, 2015 | Kosova
Megjithëse Kuvendi i Kosovës nuk i ka miratuar amendamentet kushtetuese për themelimin e Gjykatës Speciale, Qeveria e vendit do t’i riprocedojë në Kuvend për votim këto amendamente në mënyrë që institucionet e vendit ta themelojnë Gjykatën Speciale dhe ta evitojnë dërgimin e kësaj çështjeje në Këshillin e Sigurimit të OKB-së.
Kjo është bërë e ditur edhe nga drejtuesit e Qeverisë, kryeministri, Isa Mustafa, dhe nga zëvendësi i tij, Hashim Thaçi, të cilët kanë thënë se në ditët në vijim ekzekutivi i vendit do të bashkërendojë aktivitetet me Kuvendin dhe me grupet parlamentare në Kuvend, në mënyrë që të miratohen këto amendamente dhe kështu t’i hapet rrugë krijimit të Speciales, pasi ata kanë vlerësuar se themelimi i saj është jetike për shtetin e Kosovës.
Gazeta “Zëri” ka mësuar se ky opsion mbështetet edhe nga partnerët ndërkombëtarë të Kosovës, të cilët nuk dëshirojnë që kjo çështje të shkojë në Këshillin e Sigurimit. Në anën tjetër partitë opozitare kanë thënë se riprocedimi i këtyre amendamenteve në Kuvend është e papranueshme dhe se, sipas tyre, Kuvendi i Kosovës përmes mosmiratimit të tyre ka mbrojtur sovranitetin e shtetit. / Reporteri
von Zemraadmin | Juni 28, 2015 | Kosova
Paralajmërimin e Qeverisë së Kosovës për riprocedimin e ndryshimeve kushtetuese në Kuvend ndaj Gjykatës Speciale, Lëvizja “Vetëvendosje” i ka quajtur si fundi i demokracisë.
Shefi i Grupit Parlamentar të “Vetëvendosjes”, Glauk Konjufca, të shtunën në një konferencë për medie ka deklaruar se ndryshimi i riprocedimit të ndryshimeve kushtetuese është një shkelje e demokracisë në vend. Ai këtë e ka vlerësuar si kushtëzim i votimit të Speciales. Konjufca gjithashtu theksoi se deputetëve u është bërë shantazh edhe me Rusinë për t’u votuar Specialja.
“Rusia është shtet diktatorial në Evropë. Në këtë shtet vritet shprehja e lirë. Pra, ky shtet nuk ka kredibilitet t’i gjykojë ushtarët tanë”, ka thënë ai.
Konjufca për medie tha se do të pranojnë bisedime për riprocedim vetëm nëse ndryshohet kushtet e themelimit të kësaj Gjykate, që njëra nga to është të mos preket sovraniteti i Kosovës.
Mosvotimi i amendamenteve të rrugës së krijimit të Gjykatës Speciale, Konjufca e ka përshëndetur duke thënë se kjo Gjykatë nuk mbron aspak në vlerat e mirëfillta të Ushtrisë Çlirimtare të Kosovës.
“Vendimi i djeshëm është i drejtë dhe lajm i mirë për Kosovën, kjo pasi që në Ligjin e Gjykatës Speciale thuhet se Republika e Kosovës nuk e gëzon të drejtën të ketë qasje në dokumentet e arkivit të kësaj Gjykate. Asnjë qytetar dhe institucion i Kosovës nuk do të ketë qasje në to, por do të kumtohen vetëm rezultatet e jo procedurat”, ka deklaruar Konjufca.
Ndër të tjera Konjufca është shprehur i gatshëm që të bisedojnë me pozitën për miratimin e Speciales vetëm nëse do të ketë alternativë të re në krijimin e saj.
Sipas tij, etniciteti dhe sovraniteti duhen të rishqyrtohen mirë para se të formohet kjo Gjykatë. Konjufca ka thënë se është e papranueshme që Specialja bëhet vetëm për shqiptarët dhe preket sovraniteti i vendit.
“Ne jemi të gatshëm të bashkëpunojmë vetëm për një alternativë të re të Gjykatës Speciale, e cila nuk i ka dy karakteristika: nuk është gjykatë vetëm për shqiptarët e para dhe e dyta të mos e shkel sovranitetin e Kosovës për të ndryshuar procesin tonë gjyqësor. Të jetë brenda sistemit tonë gjyqësor dhe të mos jetë gjykatë etnike. Për këtë jemi të gatshëm të diskutojmë tërë ditën”, tha Konjufca.
Ndryshe, Konjufca ka akuzuar edhe kryeministrin, Isa Mustafa, dhe zëvendëskryeministrin, Hashim Thaçi, të cilët, sipas tij, po bëjnë thirrje hakmarrëse ndaj atyre që kanë votuar kundër.
“Thaçi dhe Mustafa po i ngjajnë njëri-jetrit gjithnjë e më shumë, janë bërë pothuajse si ata binjakët siamezë. Njëri i kërcënon deputetët e partisë së vet që nuk e votuan si kryeministër atë, kurse tjetri i kërcënon deputetët e partisë së vet pse nuk e votuan projektin e tij të Gjykatës Speciale”, tha ai.
Ndryshe, amendamentet për krijimin e Gjykatës Speciale të premten nuk kaluan në miratim.
Për miratimin e këtyre amendamenteve ishin të nevojshme 80 vota të të gjithë deputetëve të Kuvendit të Kosovës, mirëpo ato morën përkrahjen e vetëm 75 deputetëve, meqë 7 deputetë të PDK-së votuan kundër e 2 të tjerë abstenuan, kurse deputetët e opozitës e bojkotuan votimin. (Zeri)
von Zemraadmin | Juni 28, 2015 | Kosova
Punimet ne autostradën Prishtinë – Han i Elezit i janë ofruar kryeqytetit. Autostrada Prishtinë – Hanë i Elezit është e gjatë 55 kilometra dhe pritet të përfundojë në fund të vitit 2017.
Lidhja juglindore e Prishtinës do të jetë gati në fund të korrikut. “Bechtel & Enka”, kompania ndërtuese e autostradës, ka rritur dinamikën e punës për ta përfunduar këtë pjesë.
“Jemi në pikën që quhet lidhja me M2, dhe kjo është pika ku lidhet rruga 6 me rrugën ekzistuese. Do ta shihni që ekipi që po vjen në këtë drejtim, po sillen të gjitha aktivitetet në këtë pjesë. Siç do ta shihni edhe në dizajn, ajo që po bëjmë është se do të ketë një lidhje të mirë në rrugën ekzistuese”, tha Menaxheri i projektit “Bechtel & Enka”, Chris Jennions.
Në punët që bën Bechtel-Enka është vështirë të pranohet fakti që punimet mund të kalojnë afatin që e ka parashikuar kompania.
“Që nga momenti që bëmë ceremoninë e hapjes, objektivi jonë ka qenë që kjo rrugë të hapet në pikën e trafikut dhe ne jemi brenda planit që kjo pjesë të hapet kur trafiku të jetë i rënduar. Plani ynë është që brenda korrikut ta kemi përfunduar këtë pjesë”, tha ai.
Shtrimi i asfaltit është një pjesë e rëndësishme e autostradës. Menaxheri që merret me këtë element të fundit të autostradës, thotë se kushtet atmosferike lejojnë shtrim të mirë të asfaltit.
“Të gjitha aktivitetet po shkojnë siç ishte planifikuar, po ajo që mund vërej në këtë moment, është që po punohet dhe po shtrohet në drejtimi të asaj që do të hapet, pra të gjitha punimet po shkojnë në atë drejtim dhe punohet në nyjën lidhëse“, tha menaxher i shtrimit të asfaltit, Mehmet Taktak.
Ndërtimi i Autostradës për Shkup, ka filluar para afro një viti. Deri tash janë hapur për punë afër 10 kilometra, ndërsa puna kryesore është përqendruar në lidhjen e kësaj rruge në juglindje të Prishtinës.
Autostrada Prishtinë – Hanë i Elezit është e gjatë 55 kilometra dhe pritet të përfundojë në fund të vitit 2017. E gjithë rruga po financohet nga buxheti i Kosovës në vlerë prej 600 milionë eurosh. / RTKLive
