von Zemraadmin | Juni 10, 2015 | Kosova
Eshtrat e Isa Boletinit përfundimisht pushojnë në vendlindjen e tij në Boletin
Ai u rivarros me nderime të larta nga qytetarë të shumtë dhe personalitete publike.
Edhe pse për në Boletin Isa Boletini nuk u përcoll nga garda e FSK-së e cila gjatë gjithë kohës ishte në përcjellje të tij, funerali I heroit për herë të fundit u lëshua në varr nga burra me veshje kombëtare.
Në ceremoninë e rivarrimit në Boletin kanë marrë pjesë edhe kryetari I komunës Agim Bahtiri, kryetari i Kuvendit Kadri Veseli dhe figura tjera publike.
Ceremonia ka përfunduar pa asnjë ekses, ndërkaq policia është kujdesur gjatë gjithë kohës për të shkuar mbarë kjo ceremoni.
Heroi i kombit Isa Boletini është vrarë më 1916 në Podgoricë nga malazezët dhe kthimi i eshtrave të tij po bëhet pas 99 vjetësh. (RTKlive.com)
von Zemraadmin | Juni 10, 2015 | Kosova
Të dëbuar nga qyteti i Shkodrës,pas urdhrit të Esat Pashë Toptanit, së bashku më atdhetarë të tjerë të shquar,si Aqif Pashë Elbasani dhe shumë nga pjesëtarët e Komitetit të Kosovës, atij i zune prite.
Isë Boletini, djemtë e nipat e tij, u vranë më 23 janar 1916, në Podgoricë. Të dëbuar nga qyteti i Shkodrës, pas urdhrit të Esat Pashë Toptanit, së bashku më atdhetarë të tjerë të shquar, si Aqif Pashë Elbasani dhe shumë nga pjesëtarët e Komitetit të Kosovës, atij do i zinin pritë forcat ushtarake malazeze, teksa po kalonte urën e qytetit. Thirrjes për të dorëzuar armët, pa ngurrim, ata iu përgjigjën flakë për flakë dhe, si e kishin thënë shpesh herë, zgjodhën rënien e tyre heroike, në vend të qelive të errëta të burgjeve malazeze
Më 25 janar 1916 u bë varrimi i parë i Isa Boletinit, djemve e nipave të tij. Të gjithë dyqanet e shqiptarëve që jetonin asaj kohe në Podgoricë dhe që përbënin ajkën e qytetit, në nderimin e Isa Boletinit, u mbyllën. “Në varrimin e të vrarëve, më 25 janar, muarën pjesë të gjithë shqiptarët që qenë në Podgoricë, të cilët hoqën edhe shpenzimet e varrimit. Nasuf Dizdari nga Shkodra mbajti fjalën e rastit”, shkruan në librin e tij ,”Isa Boletini”, një figurë e shquar e letrave dhe e atdhedashurisë shqiptare, Skënder Luarasi, djali i Petro Nini Luarasit.
Nasuf Dizdari ka qenë i njohur gjërësisht si një figurë e përdalluar atdhetare, publicist, sidomos folklorist, por me lidhje të gjera me qarqet kombëtare të kohës, si ishin përgjithësisht Dizdarët në të gjitha kohërat.
Varrimi i parë i Isa Boletinit u bë në një ditë të ftohtë, jashtëzakonisht të akullt, e megjithatë sheshi ishte tej e përtej me figura të shquara dhe njerëz të zakonshëm. Pas këtij varrimi, eshtrat e Isa Boletinit do të shpërnguleshin edhe më pas, për të ardhur tek dita e sotme, 10 qershor 2015, pas 90 viteve, kur më në fund do të kenë edhe tabanin e tyre të përjetshëm.
Çfarë u tha në varrimin e parë të Isa Boletinit? Enver Dizdari, i biri i atdhetarit Nasuf Dizdari, do e ruante për shumë dekada këtë fjalë historike, fragmente të së cilës po sjellim më poshtë:
“O atdhetar i flaktë dhe trim i trimave të Shqipnisë, o sokol i nanës Kosovë dhe besnik i betuem i atdheut, o fidqar i kombit dhe mik i jem i ngushtë, Isë Boletini. Nuk po më trembin as topat, as pushkët, as bajonetat e gjeneralit katil Vukoviqit, as çetat serbomalazeze, as gjendja shumë e turbullueme që po kalojmë na të syrgjynosun dhe populli shqiptar podgoriçan në këto çaste, për me folun këto pak fjalë, nö emër të syrgjynosunve që ndodhen këtu, n’emnin e shqiptarëve podgoriçanë që kanë mbyllun rrugët e qytetit dhe n’emin e dashamirve të tjerë. Ti me djemt tuj, me dy nipat dhe tre besnikët tuej kosovarë, me 23 të muejit kallnuer 1916, mbas një përleshje të përgjakshme kundër ushtrisë malazeze dhe çateave serbo-malazeze, vetë i teti batë deken me nder të madh këtu tek Ura e Podgoricës. Shumëfish e paguet vedin tuej! Zemra juej shqiptare qe shumë ma e fortë se pushka tradhtare dhe katile e dushmanit. Shqiptari ka luftuem gjithmonë për të drejtën e vet, për nderin e atdheut dhe të kombit, për gjuhën e zakonet e veta. Kurr’ nuk e ka dorzuem e as nuk e ka lakmuem pushkën. Besa, burrnija, trimnija, madhështia, kuvendi yt i matun dhe kyveti i fjalës tande nifen nga të gjithë shqiptarët dhe nga diplomacia evropjane. Për 15 vjet me rradhë braktise familjen, vllazninë, mall e gja, dhe u bane mburoja besnike e vatanit. Nuk u tunde as nga sulltani, as nga krajlat, as nga topat, as nga pushkët. Vrasja jote dhe e trimave tuej asht një hupje shumë e madhe për Shqipninë dhe shqiptarët. U vra në përleshje me dushmanët serbo-malazez biri i Skenderbeut dhe vazhduesi i rrugës së tij. Në këtë çast kaq nazyq, të gjithë shqiptarët përjashta dhe brenda atdheut betohen përpara xhenazeve tueja, se nuk do të prajnë kurr’ luftën kundër të gjithë anmiqve të atdheut e të kombit tonë. Do të luftojmë si Skanderbeg famëmadhi, si Karamahmud pasha, si Ali pashë Tepelena, si Dasho Shkreli, si Hamz Kazazi, si Oso Kukë baroti me dragojtë e luanët e tyre.
Me 28 të muejit Nanduer 1912, tue udhtuemun me javë nëpër male, pyje e fusha, n’at të ftohtë të madh, shkove me djemt, nipet e sokolat tuj kosovarë, nga Kosova në Vlonë, për shpalljen e mosvarësisë kombtare dhe të ngritunit e flamurit kombtar. Në Vlonën kreshnike ti u bane krahu i djathtë ma i afërm i ma i kyvetshëm i Ismail Qemalit, shtylla e mosvarësisë. Me sokolat tuej i dole në pritë urdive të gjeneralit Xhavit Pasha, luftuet randë kundër tyne, sa nuk i latë me hymun në Vlonë.
Me 1913 shkove me Ismail Qemalin delegacion në Romë në Vjenë, dhe në Londër, në konferencën e ambasadorëve, për caktimin e kufijve të Shqinisë. Në bisedë e sypri, ministri anglez pyeti: cili nga ju asht caktuem me folë për kufijtë e Shqipnisë? Kyretari i jonë, ismail Qemali gjegjet: për çështjen kaq të randsishme për fatet e atdheut tonë do të flasë Isa beg Boletini. Si asht e mundun të flasë për një çështje kaq të randsishme për kufijt e Shqipnisë një malsor i veshun me çakçir, me jelek e xhamadan, me qeleshe të bardhë dhe me caruqe? Me nji diplomaci shumë të hollë, kryetari jonë i nderuem i thotë”…Isa beg Boletini që do të flasi këtu në emnin e kombit shqiptar asht biri i Shqipnisë, malsuer i Kosovës nanë, i Kosovës sokoleshë e trimneshë. I Kosovës së djegun e të përvlueme për bashkimin e kombit e të vatanit. Isa beg Boletini aht kryekapidani, kryekalorësi, kryeprijsi i ma tepër se 40 mijë vullnetarëve trima e fidiqar që për 15 vjet rrjesht luftoi pa pra me sokolat e ndihmsat e tij kundra zaoptuesve turq. Me urtinë, zotësinë e burninë e tij të pashoq i bashkoi në një komandë të githa forcat e çetave që luftojnë sot në tanë Shqipninë për këtë qëllim të shejtë.
Ministri anglezu, sër Eduard Grei të vunë përpara hartën. Shikoni të katër kërkesën tuej për kufijt e Shqipnisë. Ti, Isë Boletini ju gjegje: “Zotni Ministër! Merrni mundimin e formoni një komision internacional njerëzish të ndershëm, të zot, të paanshëm, me harxhet tona, më jepni me vedi e me shokët e mij me ju diftuem atyne në vend e me dishmira të gjalla kufijt tonë me Serbinë, Malin e Zi,Greqinë. Çfarë të shohin në vend ky komision njerëzish të ditshëm e të paanshëm, le ta shenojnë në hartë. Kësaj i thonë me ba punë pa hile. Unë dhe ndihmsat e shokët e mij i njohim shumë mirë kufijt e vatanit tonë, sepse i kena përshkue pllamë për pllamë në luftë.
Nuk asht e mundun që nji mbretni e vjetër, si e jueja e me një parlament kaq të moçëm, që mbretni që ka thye e ka zanë rob Napolonin e madh, mbretin ma të kyvetçëm të Europës, ju që keni një hyqm kaq të madh përmbi pjesën ma të madhe të botës, ju qi jeni mbretnesha e detit, të mos e njifni storen e Shqipnisë dhe kufijt e vendeve të saj që ndodhet në zemren e Ballkanit e të Evropës. Ju e dini shumë mirë, ministër se në parlamentin e parë turk deputetët e parë të katër vilajeteve, Shkodër, Shkup, Manastir e Janinë që po të flasim na sot këtu, kanë kërkue me u mbledhë në “Autonominë e Shqipnisë” dhe shkëputjen e Shqipnisë nga Turqia”.
Ishin disa fragmente nga fjala e atdhetarit Nasuf Dizdari. Të mbajtura thuajse një shekull më parë. Por fjala nuk ka mort, kur ajo është në nderimin e figurave të mëdha të kombit. Njëri prej tyre, Isa Boletini, po rivarroset edhe një herë, tashmë në vendlindjen e tij, si një dëshmi e një kohë të re. /gazetadita/
von Zemraadmin | Juni 10, 2015 | Kosova
Kryeministri i vendit Isa Mustafa ka postuar një shkrim në llogarinë e tij në Facebook, kushtuar ditës së sotme që ishte e veçantë ngaqë u rivarrosën eshtrat e Isa Boletinit.
Ky është postimi i plotë i Mustafës:
“Përtej simbolikës, kthimi i eshtrave të Heroit të Kosovës, Isa Boletini, në Kosovë, në vendlindjen e tij, është detyrim i yni shtetëror, ndaj këtij vigani të historisë sonë kombëtare, jeta dhe vepra e të cilit ka qenë, është, dhe do të mbetet përgjithmonë inspirim për brezat tonë të rinj.
Isa po i kthehet përfundimisht Kosovës, po i kthehet Boletinit të tij të dashur, në të cilin pushtues të ndryshëm rrënuan çdo gjë, ia dogjën kullat disa herë, porse ai dhe Boletinët e tij i ringritën sërish nga e para të gjitha ato që u rrënuan, siç është ringritur shqiptari prore që nga koha e Skënderbeut e këtej.
Isa do të prehet në dheun e vendlindjes së tij në Boletin, po rivarroset aty nga u nis në beteja me trimat e tij, aty nga shtegtoi në Vlorë për të shpall pavarësinë e shtetit shqiptar.
Isa Boletini është Hero i Kosovës, dhe si i tillë duhet të ketë nderimin e të gjithë neve dhe të gjithë qytetarëve.
Isa Boletini nuk është vetëm simbol i unitetit shqiptar, simbol i vetëflijimit për lirinë dhe prosperitetin e kombit të tij, por është edhe një simbol i jashtëzakonshëm i luftës dhe flijimit për lirinë universale njerëzore.
Zoti e bekoftë Isa Boletinin dhe familjen e tij heroike!
Zoti i bekoftë të gjithë ata që punuan dhe ndihmuan që heroi ynë të kthehet dhe të varroset në tokën e tij!
Zoti e bekoftë Republikën e Kosovës dhe miqtë e saj! (RTKlive.com)
von Zemraadmin | Juni 5, 2015 | Kosova
Emisari presidencial i Shteve të Bashkuara për Koalicionin Global kundër Shtetit Islamik, gjenerali John Allen, ka qëndruar të enjten në Kosovë, për të zhvilluar takime me udhëheqësit e institucioneve qendrore në Kosovë.
Fillimisht, gjenerali amerikan është takuar me presidenten e Kosovës, Atifete Jahjaga, zyra e së cilës përmes një komunikate ka njoftuar se "presidentja ka shprehur vendosmërinë dhe ka nënvizuar përpjekjet konkrete të institucioneve të Republikës së Kosovës që vendi të mos bëhet strehë e grupeve terroriste apo burim i ekstremizmit".
“Gjenerali Allen vlerësoi anëtarësimin e Kosovës në koalicionin global në luftën kundër ISIS-it dhe pjesëmarrjen e saj në Grupin Punues të Koalicionit për shpërndarjen e mesazheve të kundërta.
Gjenerali Allen dhe presidentja e Republikës së Kosovës u pajtuan rreth rëndësisë së shkëmbimit të të dhënave dhe të informacioneve për të ndihmuar në ndalimin e valës së luftëtarëve të huaj dhe i diskutuan një varg mënyrash se si mund të zgjerohet dhe thellohet përqasja ndaj komuniteteve që mund të rrezikohen nga radikalizmi”, thuhet në komunikatën e presidencës së Kosovës.
I dërguari amerikan është takiuar edhe me kryeministrin e Kosovës, Isa Mustafa dhe ministrin e Punëve të Jashtme, Hashim Thaçi.
Ambasada e Shteteve të Bashkuara në Prishtinë, përmes një deklarate për media, ka thënë se gjatë takimeve është diskutuar "bashkëpunimi për ta degraduar dhe mposhtur ISIS-in".
"Gjenerali Allen u pajtua me zyrtarët e Kosovës rreth rëndësisë së përmirësimit të shkëmbimit të të dhënave dhe të informacioneve për të ndihmuar në ndalimin e lëvizjes së luftëtarëve të huaj, dhe diskutuan një varg mënyrash se si ne mund të zgjerojmë dhe thellojmë përqasjen ndaj popullatave që janë të rrezikuara nga radikalizimi", thuhet mes tjerash në deklaratën e ambasadës amerikane.
Ndryshe, njohësit e rrethanave të sigurisë në Kosovë, vlerësojnë se vizita e gjeneralit Allen në Kosovë, duhet të jetë motivuese për konsolidim në luftën kundër organizatave të njohura ndërkombëtarisht si terroriste, siç është Shteti Islamik.
Skënder Perteshi nga Qendra Kosovare për Studime të Sigurisë, thotë për Radion Evropa e Lirë se vizita e emisarit presidencial të Shteteve të Bashkuara për Koalicionin Global kundër Shtetit Islamik, duhet parë në dritën e vazhdimësisë së përpjekjeve, koordinimit dhe bashkëpunimit të Kosovës me organizatat ndërkombëtare për të parandaluar dhe luftuar përhapjen e ekstremizmit dhe radikalizmit në Kosovë.
“Kosova ka qenë pjesë e samitit të Uashingtonit dhe po ashtu edhe në samitin e Tiranës, që është mbajtur muajin e kaluar. Këto vizita janë edhe një përpjekje për të ngritur marrëdhëniet ndërkombëtare ndërmjet shteteve për luftimin e ekstremizmit dhe për të vazhduar që të koordinojnë të gjitha aktivitetet dhe bashkëpunimin ndërkombëtarë në parandalimin e këtij fenomeni”, tha Perteshi.
Ndërkaq, Naim Maloku, ekspert për çështje të sigurisë, duke folur për Radion Evropa e Lirë, vlerëson se vizita e gjeneralit Allen, është motivim për institucionet dhe shoqërinë e Kosovës për luftimin e ekstremizmit fetar.
“Ardhja e këtij personaliteti, kreut të Koalicionit kundër ISIS (Shteti Islamik), në Kosovë, duhet kuptuar si një mbështetje për përpjekjet që është duke i bërë Kosova dhe duhet ta kuptojmë si fakt se çfarë rëndësie ka Kosova për këtë koalicion. Kjo duhet të na motivojë edhe më shumë në përpjekjet tona, si komb, për t'u konsoliduar edhe më mirë për ta demaskuar këtë ideologji (të Shtetit Islamik), që është rrezik edhe për ne”, ka theksuar Maloku.
Të dy njohësit e rrethanave të sigurisë, vlerësojnë se Kosova tashmë ka krijuar mekanizmat ligjor dhe të sigurisë për parandalimin dhe luftimin e ekstremizmit dhe radikalizmit fetar.
Sipas tyre, Kosova tashmë ka ligjin që penalizon jo vetëm shkuarjen e qytetarëve të Kosovës për t’iu bashkangjitur Shtetit Islamik në luftërat në Siri dhe Irak, por edhe rekrutimin, nxitjen dhe propagandën që ndërlidhen me këtë qëllim.
Por, Perteshi vlerëson se pengesë për Kosovën në luftë kundër ekstremizmit mbetet mungesa e bashkëpunimit ndërkombëtar policor, për shkak se Kosova ende nuk është pjesë e Interpolit dhe iniciativave rajonale të sigurisë, të cilat do ta mundësonin shkëmbimin e informacioneve inteligjente dhe të ndjeshme, për lëvizjet e personave të ndryshëm që janë pjesë e strukturave dhe grupeve ekstremiste atje.
“Po, me rëndësi është që, para se Policia e Kosovës dhe mekanizmat e sigurisë të merren me çështjen e ekstremizmit dhe radikalizmit, shoqëria duhet me qenë ajo që duhet të ketë përgjegjësi për ta luftuar këtë fenomen. Shteti, të gjitha mekanizmat e tij, organizatat e shoqërisë civile, mediet dhe qytetarët duhet të veprojnë dhe ta luftojnë idenë".
"Vetëm nëse ne i luftojmë idetë, shkaqet dhe faktorët që ndikojnë tek qytetarët tonë që t’iu bashkohen grupeve ekstremiste, atëherë do të jemi në gjendje që ta reduktojmë numrin e qytetarëve që bëhen pjesë e grupeve ekstremiste në Siri dhe Irak, si dhe kudo që të jetë në vendet tjera”, tha Perteshi.
Gjenerali John Allen në Kosovë ka arritur pas vizitës që i bëri Dohas në Katar, ku ka marrë pjesë në forumin mbi marrëdhëniet ndërmjet Shteteve të Bashkuara dhe Botës Islame.
Atje, emisari amerikan ka thënë për ISIS-in se grupi militant ka pasur ndikim global dhe mund të shkaktojë kaos mbi përparimet e njerëzimit, nëse nuk ndalet.
Gjenerali i pensionuar tashmë, i emëruar nga presidenti amerikan, Barack Obama në shtator të vitit të kaluar, për të ndërtuar koalicionin botëror kundër Shtetit Islamik, tha se grupi militant nuk është vetëm problem irakian apo sirian, por një “problem rajonal me tendencë për ndërlikime globale”.
Ky grup tashmë ka humbur çerekun e rajoneve të banuara, të cilat i kontrollonte në Irak, por për ta mposhtur ideologjinë e IS-it do të duhet një gjeneratë e tërë apo më shumë, ka thënë gjenerali Allen.
Ai ka folur edhe për luftëtarët e huaj të cilët i janë bashkuar këtij grupi, duke thënë se kufiri i Turqisë me Sirinë dhe ai me Irakun paraqesin “vijat e fundit të mbrojtjes”.
Ndryshe, sipas hulumtimit të Qendrës Kosovare për Studime të Sigurisë, mbi 230 qytetarë nga Kosova thuhet se u janë bashkuar organizatave terroriste në Siri edhe Irak, duke e renditur Kosovën në vendin e tetë nga numri i shteteve, qytetarët e të cilave u janë bashkuar luftërave të huaja. /REL/
von Zemraadmin | Juni 4, 2015 | Kosova
Sami Lushtaku e ka shkruar një letër publike në të cilën ai flet rreth dënimit të tij dhe “kontributit” të bashkëpartiakëve të tij në këtë proces.
Letrën e plotë mund ta lexoni më poshtë.
Kënd e vrava unë?
Pyetje publike për të gjithë ata që ndajnë drejtësi në Kosovë.
Shkruan: Sami Lushtaku
Javën e kaluar ndodhi ajo që pritej të ndodhte.
Pas një procesi të gjatë e mundimshëm gjyqësor, një panel i gjyqtarëve të EULEX’it me gjeti fajtor për një vrasje, duke më dënuar, në shkallë të parë, me 12 vjet burg.
Sigurisht se ky dënim nuk është aspak i lartë, nëse e marrim të mirëqenë vrasjen e një civili, të paarmatosur, dhe për më tepër me duar të lidhura.
Nëse unë do të isha në panelin e gjyqtarëve, dhe nëse do të duhej të gjykoja një krim të tillë, jam i bindur që do të propozoja një dënim edhe më të lartë.
Ky përveç që është krim i përcaktuar me ligjet në fuqi të Kosovës, është edhe kundër të drejtës tonë zakonore. Nuk vritet njeriu i dorëzuar. Njeriu i dorëzuar, ose njeriu që të ‘bie me n’ore të Zotit’ për më tepër duhet të mbrohet.
I kam përcjellë më vëmendje polemikat e bëra përmes mediave, në mes të prokurorëve dhe avokatëve, lidhur me rastin tim, pas mbylljes së rastit tim. I kam përcjellë më vëmendje edhe reagimin e publikut dhe përkrahësve të mi.
Dëshiroj të bëj të ditur për të gjithë, se unë jam përcaktuar që në fillim që këtë betejë ta fitoj në gjykatore, e jo në rrugë. Edhe pse, qarqe të caktuara, që punojnë kundër interesit të vendit, sigurisht e kanë parashikuar gabimisht se unë do të zgjedhi rrugë tjetër.
E kjo nuk duket të jetë aspak punë e lehtë. Sidomos kur përballësh me procese gjyqësore të çuditshëm për sistemet bashkëkohore të drejtësisë. Kur je i detyruar të mbrohesh për vrasje të panjohura, siç ishte rasti më mua. Kur detyrohesh ta argumentosh se nuk e ke vrarë një civil, që askush nuk e njeh kush është ai. Kur askush nuk e njeh familjen e tij. Kur askush nuk e kërkon. Sepse ai nuk ekziston.
Në këtë proces që zgjati dy vjet unë, dhe avokati im, u mbrojtëm kundër një krimi te pandodhur. Ose së paku për ne të pandodhur. Prokurorët thonë se e dinë kush është viktima. Por këtë e mbajtën si sekret të tyre për dy vjet.
Më lejoni tash të tregoj se gjatë luftës ndodhin krime të ndryshme.
Nuk janë poetët, të parët, ata që i rrokin armët. Dua të them që në radhët e formacioneve ushtarake, të natyrës që ishte UÇK, disiplina ushtarake nuk ishte pika më e fortë. Pika më e fortë ishte vullneti për të luftuar kundër një ushtrie shumë brutale, shumë më të madhe në numër, siç ishte ajo e Serbisë, në krye të së cilës ishte Sllobodan Milloshevic, i njohur nga bota si Kasapi i Ballkanit.
Dua të them që krimet që kryheshin nga forcat e Milloshevicit ishin edhe si sasi, e edhe si ‘cilësi’, shumëfish më të mëdha dhe më makabre se sa ato që mund të janë kryer kryer, po themi, ‘prej nesh’.
Edhe unë jam i mendimit, se duhet të gjykohen të gjitha krimet, qofshin edhe ato më të voglat. Nuk kam dyshim se duhet të hetohemi dhe gjykohemi edhe ne që po luftonim për lirinë e popullit tonë. Sigurisht se mund të kryhen krime në emër të lirisë. Mirëpo, është gabim i rëndë që ne të hetohemi dhe të gjykohemi për çfarë kemi bërë në luftë, nisur nga paragjykimet se çfarë kemi bërë pasluftës.
Sigurisht se pushteti të konsumon.
Një dekadë qeverisje e PDK, pjesë e së cilës jam edhe më tutje, ka krijuar kundër nesh emocione të forta negative. Dhe nuk janë vetëm kundërshtarët politik që kanë krijuar kundër nesh, të njohur si ‘krahu i luftë’, opinione të ashpër negativ.
Një kontribut të madh, kundër nesh, e kanë dhënë edhe bashkëpartiakët, si ministrat dhe zëvendësministrat. Lobimi i tyre intensiv në Ambasada dhe në EULEX, kundër nesh, për një kohë të gjatë, i ka dhënë frytet e duhura, ose të pritura, të tyre.
Në këtë mënyrë reputacioni ynë publik është rrënuar ditë pas dite, javë pas jave e vit pas viti. Ne nuk kemi qenë aq të sofistikuar sa të kuptojmë ketë lojë të ndytë.
Dhe ja ku jemi sot.
Pa përkrahje mediale. Pa përkrahje publike. Dhe pa përkrahje të duhur politike. Qoftë edhe kur dënohemi në mënyrë absurde, për vrasje të personave të panjohur. Kjo ka ndodhur sepse ndaj nesh ‘procesi gjyqësor’ ka zgjatur plot 10 vjet. Të gjitha vjedhjet, keqpërdorimet, abuzimet, tenderët etj., të realizuara më mjeshtri nga eksponent të PDK’së na janë faturuar ne. Dhe meqë kjo nuk ka mundur të argumentohet, sepse nuk kishte ndodhur, atëherë me dëshmitarë të përpunuar na dënuan për krime të luftës.
Për ketë arsye, qytetarët, ambasadorët, mediat etj., ishin të kënaqura që ne të dënoheshim, qoftë edhe për vrasje të pandodhura, vetëm që të na ndalnin.
Unë do të vazhdoj të insistoj në kërkimin e drejtësisë, duke kërkuar që së paku ta njoh ‘viktimën’ time, që e paskam vrarë më duar të lidhura. Nëse kjo është ë vërtetë, siç pretendon prokurori, e tash së fundmi edhe gjyqtarët, unë do të doja shumë që t’u kërkoja falje familjes së ‘viktimës’.
Për këtë arsye, ashtu siç edhe e parashohin ligjet në fuqi, unë së bashku me avokatin tim do ta kontestojmë vendimin e shkallës së parë, në shkallë të dytë.
Në mënyrë që e vërteta të triumfojë deri në fund, në mënyrë që fundi të jetë meritor, që drejtësia të kënaqet përfundimisht, ne lusim të gjitha mediat që të kërkojnë transparencë sa më të madhe. Kërkojmë prej mediave, prej organizatave qeveritare, organizatave për mbrojtjen e lirive dhe të drejtave të njeriut, që të janë dëshmitarë të këtij procesi.
Unë nuk po kërkoj asgjë më shumë, se sa emrin e personit që e vrava, me duar të lidhura. Kushdo që e di ketë emër la ta thotë.
Dhe krejt në fund:
Këto ditë, shumëkush po përdorë emrin tim si pengesë për votimin ose jo të ndryshimeve kushtetuese, që i japin rrugë aprovimit të Ligjit për Gjykatën Speciale
Publikisht lus të gjithë, posaçërisht deputetët dhe zyrtarët e PDK’së, që mos të manipulojnë me emrin tim. Se a do ta votojnë ose jo këto ndryshime, se a do ta miratojnë ose jo ketë ligj, kjo është një çështje ekskluzive e tyre. Ata duhet të vendosin, sipas bindjes së tyre të lirë. Nuk dëshiroj ta lidh assesi rastin tim, me një rast tjetër.
Përfundimisht, personalisht nuk kam qëndrim për themelimin e kësaj gjykate. Tash e dy vite po merrem me rastin tim. Me gjykatën le të merren ata që i kanë marrë votat e qytetarëve. (klankosova.tv)
