von Zemraadmin | Jun 28, 2015 | Ekonomi-Kosove
Britania e Madhe do të investojë 27 milion euro në qytetin e Skenderajt në një fabrik për procedimin e panxhar sheqerit.
Përmes një komunikate Komuna e Skenderajt ka njoftuar se të mërkurën më 24 qershor Ambasadori Britanik Ruairi O’Connell do ta vizitojë Skenderajn ku do të njoftohet për së afërmi.
“Të mërkurën, 24 Qershor, nga ora 9:00, Ambasadori Britanik Ruairi O’Connell do të vizitojë Komunën e Skenderaj dhe do të takojë Zëvendës Kryetarin e Komunës, Fadil Nura.
Ambasadori do të jetë i shoqëruar nga përfaqësuesit e kompanisë “DarkStar” dhe do të ketë kënaqësinë të njoftojë për investimin e ri Britanik në Kosovë. “DarkStar” do të fillojë një biznes të ri në Skenderaj, do të ndërtojë fabrikën për procesimin e panxhar sheqerit, ndërtimi i cilit do të zgjas 8 muaj.
Investimi i ri Britanik në Kosovë do të kapë vlerën prej afro 27 million euro. Ky biznes do të punësojë 400 punëtorë dhe në mënyrë indirekte do të punësojë disa mijëra bujq në regjionin e Drenicës”, thuhet në komunikatën e Komunës së Skenderajt. / Reporteri
von Zemraadmin | Jun 28, 2015 | Ekonomi-Kosove
Ishte premtimi kryesorë që patën në fushatën parazgjedhore edhe Hashim Thaçi por edhe Isa Mustafa. Thaçi madje tha se me krijimin e një “Fondi për Punësim” do të investohen rreth 500 milion euro në Bujqësi dhe të krijohen mbi 50 mijë vende të reja pune.
Ky bum ekonomik u përmend gjatë gjithë fushatës parazgjedhore, e deri më tani ky fond ka mbetur vetëm premtim.
Si PDK e po ashtu edhe LDK që tani kanë pushtetin nuk kanë bërë ndonjë lëvizje rreth këtij “Fondi të Punësimit”.
Ky fond mendohej të arrihej përmes fondeve të privatizimit, por krejt kjo nuk po realizohet pa u formuar bordi i Agjencionit Kosovar të Privatizimit (AKP).
Me formimin e bordit një pjesë e këtyre mjeteve mund të përdoren për zhvillimin ekonomik të vendit por jo të gjitha në tërësi që përllogaritet të jenë mbi 500 milion euro.
Pengesa kryesore për ti përdorë një pjesë të madhe të mjeteve nga shitja është procesi i papërfunduar i likuidimit të ndërmarrjeve.
Ndryshe dy partitë në pushte gjatë fushatës parazgjedhore kishin premtuar krijimin e vendeve të reja të punës dhe zhvillim ekonomik duke u bazuar në kthimin e mjeteve të lartpërmendura.
Ndërsa mjetet e trustit pensional aktualisht përmes letrave me vlerë financohet buxheti i shtetit. Ministri i Financave Avdullah Hoti ka thënë se mjetet e trustit janë kursime të qytetarëve dhe si të tilla përmes letrave me vlerë shfrytëzohen në ekonomin e vendit.
“Nuk janë para publike, nuk janë para të shtetit të Kosovës, të qeverisë së Kosovës, janë mjetet që ne qytetarët i detyrojmë të kursejnë nga të ardhurat e tyre…Trusti pensional është akteri kryesor i tregut me letra me vlerë. Ne brenda vitit i grisim i marrim praj tregut financiar në Kosovë rreth 100 milion euro në letra me vlerë me të cilat e financojmë buxhetin. Një pjesë e madhe e këtyre letrave me vlerë i blen trusti pensional në njëfarë mënyre ne po i fusim ato mjete në ekonomi. Normalisht ka hapësirë ende të rritet pjesëmarrja e trustit pensional në tregun financiar duke blerë më shumë letra me vlerë”, ka thënë Hoti.
Ndërsa mjetet e privatizimit sipas Hotit, janë mjete publike por që pa u konsoliduar bordi nuk mund të shfrytëzohen.
“Mjetet e AKP-së të privatizimit ato janë para publike në momentin që kryhen kërkesat e punëtorëve potencial ato mjete vijnë në buxhetin e shtetit dhe përdoren për projekte zhvillimore. Ne i kemi bërë të qartë edhe në program qeverisës se do të krijojmë një fond zhvillimor edhe me mjete të qeverisë edhe të privatizimit për të financuar projekte kapitale… Unë po besoj që shpejt themelohet bordi konstituohet bordi i AKP-së dhe një pjesë e mjeteve mund të shpenzohet menjëherë mund të vijnë menjëherë në buxhetin e Kosovës për të përmbush bilancin bankar”, ka thënë Hoti.
Sipas tij, vendimet e para të bordit mund të jenë për të kthyer ato mjete në qeveri janë mjete prej ndërmarrjeve që janë privatizuar për të cilat janë kryer të gjitha procedurat sa i përket përmbushjes së kërkesave të kreditorëve të agjencionit.
Visar Hapçiu, nga Oda Ekonomike Amerikane, ka thënë se duhet të ketë projekte në mënyrë që ato mjete të shfrytëzohen.
“Na i shohim si mundësi të mirë këtë propozimin që është dhënë kryesisht gjatë fushatës politike që jepte një numër i madh i partive, megjithatë duhet me pas kujdes se si duhet të menaxhohet një fond i mundshëm . Qysh dihet fondet e trustit janë fonde të kursimeve pensionale të individëve dhe duhet të jetë mënyrë shumë e kujdesshme se si duhet të përdoreshin ato…Për fondet e privatizimit që do të ishte një mundësi e mirë që të ktheheshin në vend dhe të përdoreshin për projekte, mirëpo jo për projekte afat shkurta që nuk do të kishin ndonjë efekt multiplikativ , por për projekte që do të mundësonin një rritje dhe mandej ato që do të kishin efekte më të mëdha se sa edhe vetë investimi i atyre fondeve”, ka thënë ai.
Po ashtu edhe Agim Shahini, kryetar i Aleancës Kosovare të Biznesit, (AKB), ka thënë se nuk është bërë asgjë deri më tani për ti kthyer këto para.
“Nga premtimet që i përkasin të kaluarës nga partitë politike se këto mjete do të kthehen në tregun tonë të Kosovës dhe me këto mjete do të gjenerohen vendet e punës, kjo i përket vetëm së kaluarës. Për arsye se ende nuk ka ligj, ende nuk është iniciuar asnjë ligj për ti kthyer këto para në investime çoftë me iniciativa private apo ato publike. Prandaj sa më shpejtë të krijohet infrastruktura ligjore, sa më shpejtë të vijnë këto mjete në tregun e Kosovës”, ka thënë Shahini.
E për vlerën e mjeteve të privatizimit dhe trustit nuk ka folur asnjëri prej zyrtarëve të Bankës Qendrore, as ata nga Agjencia Kosovare e Privatizimit e po ashtu përgjigje nuk kanë dhënë as zyrtarët e Trustit Pensional. (KosovaPress)
von Zemraadmin | Jun 28, 2015 | Ekonomi-Kosove
Drejtori ekzekutiv i PTK-së, Agron Mustafa, në një intervistë për TV Dukagjini, ka thënë se projekti i shtrirjes së rrjetit të internetit 3G dhe 4G është tashmë i përfunduar.
Sipas tij, 75 për qind e viseve të banuara me qytetarë kanë mbulueshmëri me 4G, kurse 89 për qindme 3G. Me 4G do të mundësohet përdorimi edhe i Video Call HD në telefonat e mençur.
Ai tha që numri i përdoruesve të Valës çdo ditë është në rritje. Madje potencoi edhe interesimin e institucioneve që të jenë pjesë e saj.
Mustafa gjatë intervistës tha që Vala ka përgatitur një gamë të madhe të produkteve.
Produkti për të rinjtë N’trip, ka arritur numrin deri në 20 mijë përdoures aktiv në tërë Kosovën. Produketet për pushuesit gjatë sezonit të verës jashtë Kosovës, sipas Mustafës janë një mundësi e mirë për klientët e Valës. Me vetëm 8.99 euro ata mund të kenë 60 min bisedë, 500 sms si dhe 4 gigabajt internet.
Drejtori i PTK-së, ka bërë me dije që Vala është e produkt i Qeverisë së Kosovës, si dhe njëri nga kontribuesit më të mëdhenj të buxhetit të Kosovës, andaj sipas tij të gjitha institucionet publike do të duheshin të ishin përdorues të Valës.
“Mbulueshmëria e gjithë territorit me shërbime 4G, telefonia fixe, interneti dhe Iptv të jenë në një pako me çmim fix, do të jenë një nga planet e Valës për këtë vit”, ka potencuar Agron Mustafa. /TV Dukagjini/
von Zemraadmin | Jun 11, 2015 | Ekonomi-Kosove
Sipas hulumtimit të tregut nga kompania zvicerane ICERTIAS, IPKO është marka më e besueshme në tregun e telekomunikimit në Kosovë, për raportin cilësi dhe çmim.
Përdoruesit kosovar të shërbimeve të telekomunikimit e kanë zgjedhur IPKO-në si ofruesin e tyre të preferuar për telefoni mobile, internet në mobil, televizion kabllor digjital, si dhe internet me brez të gjerë, duke bërë që IPKO të fitojë medaljet e Best Buy Award në të gjitha kategoritë e shërbimeve, për raportin cilësi dhe çmim për vitet 2015 / 2016.
“Best Buy Award e konfirmon se IPKO ka standarde të larta të cilësisë së produkteve dhe shërbimeve të saj, ndërsa i ofron ato me çmimet më të volitshme të mundshme. Ne jemi të nderuar për besimin e konsumatorëve tanë, ndërsa mbesim të motivuar që ta udhëheqim tregun kosovar me produkte inovative dhe shërbime cilësore” ka thënë Robert Erzin, drejtor ekzekutiv në IPKO.
Këto rezultate janë nxjerrë nga sondazhi i parë i kërkimit i Best Buy Award në Kosovë, i cili u krye nga organizata zvicerane ICERTIAS. – International Certification Association GmbH. Organizata mat përvojat dhe përmbushjen e kërkesave të qytetarëve me raportin midis çmimit dhe cilësisë të produkteve dhe shërbimeve të tregtuara. Kërkimi u krye për Kosovën në muajin prill 2015.
Si pjesë e sondazhit të kërkimit të Best Buy Award, të anketuarit u pyetën se çfarë mendonin se përfaqësonte raportin më të mirë midis çmimit dhe cilësisë, specifikisht vlera më e mirë për paratë e tyre sipas përvojave të tyre personale me produkte ose kategori specifike shërbimi në tregun kosovar.
Kërkimi në Kosovë përfshinte 50 kategori të ndryshme ekonomike në sektorë të tillë si shitjet me pakicë, ushqimi, këpucët, veshjet, kozmetika, pajisjet elektroshtëpiake, telekomunikacionet dhe financa.
Juria e Best Buy Award janë vetë përdoruesit e shërbimeve dhe produkteve që ata i zgjedhin për t’i blerë. / RTKLive
von Zemraadmin | Mai 10, 2015 | Ekonomi-Kosove
Kryetarja e Komunës së Gjakovës, Mimoza Kusari – Lila, ka vizituar fabrikën Intertex.
Kryetarja e Komunës së Gjakovës, Mimoza Kusari – Lila, ka vizituar fabrikën Intertex, e cila sot ka nisur dërgesën e parë për eksport të mbulesave për makina, eksport ky i cili realizohet për herë të parë pas gjashtëmbëdhjetë viteve.
”Jam shumë e lumtur që po nisim dërgesën e parë për eksport në Suedi. Duket një hap i vogël, por një simbolikë e madhe për Gjakovën pasi ka filluar të eksportojë dhe njëherit shprehem se jam e sigurt që me hapjen e parkut të biznesit do të zhvillojmë edhe kapacitete tjera”, ka pohuar kryetarja e Komunës, Mimoza Kusari Lila, e cila për këtë i është adresuar që nga viti i kaluar Agjencionit Kosovar të Privatizimit, që të jep në shfrytëzim pronën e disa ish-ndërmarrjeve shoqërore.
Në kontingjentin e parë eksportues janë 2.500 copë mbulesa të tilla që do të dërgohen në qendrën e kompanisë Trox, e cila edhe është investitori e kësaj fabrike në Gjakovë.
Ardita Rizvanolli, menaxhere e kompanisë “Intertex” ka bërë të ditur se pas këtij kontingjenti, në javën tjetër do të eksportohen 2.750 mbulesa ndërsa në muajin qershor pritet të dyfishohet kapaciteti i punëtorëve, si dhe kapaciteti i prodhimtarisë së mbulesave, e po ashtu pritet të fillojë edhe linja tjetër e prodhimit që ka të bëjë me prodhimtarinë e jelekëve antiplumb për ushtrinë amerikane.
RTKLive.com
von Zemraadmin | Apr 13, 2015 | Ekonomi-Kosove
Gazeta gjermane Frankfurter Allgemeine Zeitung (FAZ) prezanton planet për shndërrimin e Brezovicës në qendër të turizmit dimëror dhe veror, por vë në dyshim financimin e projektit nga kompania franceze
Qeveria e Kosovës dhe konsorciumi francez MDP Consulting – Compagnie des Alpes të martën pritet të nënshkruajnë kontratën për ndërtimin e resortit të Brezovicës.
Gazeta e njohur gjermane FAZ i ka kushtuar këtij synimi një tekst të gjatë, duke theksuar që në fillim se shumë kosovarë preferojnë të shkojnë për skijim në Maqedoni për shkak se infrastruktura e sporteve dimërore në Brezovicën e afërt është e papërshtatshme dhe jo e mirëmbajtur si duhet.
Por gjithçka mund të jetë ndryshe nëse realizohet plani për shndërrimin e Brezovicës në qendër të turizmit dimëror dhe veror. Tani, shkruan gazeta gjermane, prej nëntë teleferikëve shumica nuk punojnë; nuk punon as teleferiku i pistës kryesore në mbi 2,500 metra lartësi mbidetare. Teleferikët e tjerë punojnë herë pas here për shkak të ndërprerjes së rrymës dhe mirëmbajtjes së dobët.
E njëjta vlen edhe për hotelet, shumica e të cilëve janë ndërtuar në kohën e ish-Jugosllavisë.
“Në fund të viteve 70-të këtu është investuar shumë për ta përgatitur këtë trevë si alternativë për Lojërat Olimpike Dimërore të vitit 1984 në Sarajevë”, shkruan FAZ.
“Tani një konsorcium nën drejtimin francez synon të ndërtojë parkun më të rëndësishëm rekreativ në Europën Juglindore. Grupit i takon Compagnie des Alpes, një ndërmarrje gjysmështetërore, e cila vetë prezantohet si udhëheqëse në tregun botëror të mirëmbajtjes së terreneve të skijimit”, shkruan FAZ.
“Jemi duke planifikuar resortin më të madh në Ballkan, që do të punojë gjatë tërë vitit”, thotë Pascal Roux, shef i firmës konsultuese MDP nga Meylan afër Grenoble, e cila i prin konsorciumit.
“Dhe do të jetë në nivel të klasit botëror për familje dhe për profesionistë. Në fazën përfundimtare të realizimit, pistat do të jenë 100 kilometra të gjata, tani janë vetëm 16 kilometra. Së paku 20 teleferikë të rinj janë planifikuar. Deri në 15 mijë skiatorë mund të jenë në pista njëkohësisht, për 7,000 prej tyre do të ketë mundësi fjetjeje në hotele dhe vila”, raporton gazeta gjermane.
Sipas saj, investimi i përgjithshëm i palës franceze pritet të jetë 409 milionë euro. Planifikuesit vlerësojnë se ky resort turistik do të ketë qarkullim vjetor prej 100 milionë eurosh. Nga kjo pritet të përfitojnë edhe banorët e Kosovës, ku kuota e papunësisë është rreth 50 për qind.
Nëse gjithçka shkon mirë, në rajonin e Brezovicës llogaritet se do të hapen 3,000 vende pune, në rastin më të favorshëm gjatë gjithë vitit. Gjatë stinëve të nxehta, vizitorët pritet të joshen nga një park i madh me pishina të hapura dhe me staza për biçikleta.
Parku Kombëtar i Sharrit ka 3,400 hektarë dhe ofron përjetime në natyrë gjatë gjithë vitit. 260 hektarë gjenden në lartësi prej 900 deri në 2,500 metra lartë mbidetaere. Planifikuesit llogarisin me së paku 120 ditë skijimi, me borë artificiale madje mund të arrihen 150 ditë, deri në muajin prill. Sipas planifikuesve, në Brezovicë bie dyfish më shumë borë se në terrenet konkurrente në Maqedoni, Malin e Zi apo Serbi. Për suksesin e Brezovicës flet edhe pozita e mirë mes Prizrenit dhe Prishtinës, si dhe Shkupit, në Maqedoni. Rrugët deri te aeroportet e të dy kryeqyteteve janë 60 dhe 70 kilometra larg. Vizitorë nga 16 qytete mund të shkojnë në Prishtinë me avion për dy orë. Aeroporti i Prishtinës parashihet të ketë kapacitet për 4 milionë pasagjerë, por tani vetëm 1,6 milionë pasagjerë aterrojnë aty. Sipas Lorik Haxhiut, drejtor i konsorciumit lokal “Outdoor Kosovo”, kjo është arsyeja që edhe ndërmarrja Aéroports de Lyon merr pjesë në projektin për Brezovicën. Kjo ndërmarrje bashkë me Limak-Holding nga Turqia në vitin 2010 e ka marrë me koncesion aeroportin e Prishtinës për 20 vjet. /Reporteri.net
Përkundër planeve impresive, ende shumë pikëpyetje e shoqërojnë projektin për Brezovicën. Është ende plotësisht e paqartë se kush e financon atë. Planifikuesit shpresojnë se do të marrin kredi nga investitorët, bankat dhe institucionet qeveritare përgjegjëse për zhvillim. Lorik Haxhiu thotë për FAZ se donatorët mezi po presin për të investuar, por pas pak thotë: «Për fat të ke,q imazhi i Kosovës është i tmerrshëm. Nuk është e lehtë të gjenden investitorë». Një problem tjetër është se Brezovica gjendet në një komunë me shumicë serbe, në Shtërpcë, dhe planifikuesit duhet të marrin edhe mbështetjen e popullsisë lokale serbe, transmeton dialogplus këtë shkrim të gazetës gjermane.
